Поради врнежите од дожд, синоќа дојде е до излевање на Маркова Река кај населененото место Љубош поради што беа поплавени неколку куќи, магацини и индустриски објекти во селата Студеничани, Батинци и делови кон Пинтија. ЈСП „Скопје“ информираше дека поради поплавите од Маркова Река, автобусот со број 70 сообраќа до почетна/крајна станица Дризла и автобусот со број 33 преку населба Драчево во двете насоки.
Во текот на ноќта, на Единствениот број за итни повици 112 добиени се и пријави за поплавени куќи и во Горно Лисиче.
Од АМСМ информираа дека непроодни се локалниот пат село Горно Лисиче кон село Долно Лисиче во општина Аеродром и првиот мост во село Батинци.
Дирекцијата за заштита и спасување информира дека по излевањето на Маркова река во општина Студеничани евидентирана е материјална штета, но нема опасност по жителите од овој крај.
– Еден тим за брз одговор интервенираше со пумпи за извлекување на вода, и истите ќе интревенираат по потреба во текот на денот. Досегашните информации покажуваат дека ситуацијата е под контрола и нема опасност за жителите, освен моментално евидентирана материјална штета, наведува Дирекцијата за заштита и спасување во објава на Фејсбук.
Железници на Северна Македонија известуваат дека железничкиот патнички и товарен сообраќај од синоќа, од 22:50 часот е во прекин во правец на Лисиче и Драчево и обратно, додека патничкиот сообраќај се одвива преку станицата Трубарево.
Од Центарот за управување со кризи утринава информираа дека е пријавено поплавување на дел од булеварот „Борис Трајковски“ кај населбата Пинтија, каде исто така имало пријави за поплавени магацини.
