Од почетокот на руската инвазија во 2022 година, Украина доби значителна меѓународна финансиска и воена помош, а најголеми донатори се САД и европските земји.
Според анализата на Скај њуз, САД обезбедиле вкупно 114 милијарди евра различни видови поддршка, додека европските земји, вклучително и Велика Британија, обезбедиле 132 милијарди евра.
Ако се земе предвид само воената помош, САД водат со 64 милијарди евра, додека европските земји колективно дадоа 62 милијарди евра.
Сепак, во споредба со бруто домашниот производ (БДП) на земјите донатори, Данска, Естонија и балтичките земји одвоија поголем процент од своите економии за поддршка на Украина – околу 2 отсто од БДП. Од друга страна, САД и Велика Британија поделија околу 0,5 отсто од нивниот БДП.
Прашањето за враќање на помошта беше оживеано откако американскиот претседател Доналд Трамп неодамна изјави дека очекува Украина да „врати“ 500 милијарди долари преку приходите од минералите од ретки земји.
Иако Украина поседува одредени наоѓалишта на ретки елементи, нивната експлоатација е ограничена и скапа. Долги години овие минерални суровини останаа неразвиени поради технолошките и економските предизвици. И со целосно искористување, експертите веруваат дека Украина нема да може да оствари приход од стотици милијарди долари, како што тврди Трамп, истакнува Скај њуз.
Покрај ретките минерали, Украина има значителни резерви на јаглен во Донбас, железна руда и други суровини, но голем дел од овие ресурси се наоѓаат на територии под руска окупација.
Како ќе се развива оваа дискусија во иднина зависи од текот на преговорите меѓу Киев и Вашингтон, но во моментов нема реални економски показатели дека Украина може да ги врати средствата што ги добила исклучиво преку експлоатација на руди и ретки минерали.
