Тој ги повикува колегите пратеници, без разлика на политичката припадност, да го поддржат овој предлог-закон, бидејќи станува збор за суштинска промена која не засега сите. Ја охрабрува и пошироката јавност, активно да се вклучи во дискусијата и да даде свои сугестии.
Во пожарот што го предизвика пиротехниката во Кочани, за време на концертот на ДНК, животот го загубија 59 млади луѓе, а околу 200 се здобија со повреди.
Пратеничката група на ВМРО-ДПМНЕ по скратена постапка го менува Законот за јавен ред и мир, со што се става ред за употреба на пиротехнички средства во затворен простор. Ова го соопшти пратеникот од ВМРО-ДПМНЕ, Тони Јаревски.
Преку ова законско решение ќе се прошири и надлежноста на полицијата – механизам преку кој ќе овозможат поголема контрола при користење на експлозиви, како и побрзо и поефикасно спроведување на овој закон.
„По скратена постапка го менуваме законот за јавен ред и мир, кој ќе создаде нови механизми за воведување ред, заштита и поголема безбедност за секого. Предлог законот го стеснува обрачот околу оние кои создаваат ризици преку злоупотреба и незаконско користење на пиротехнички средства, особено во затворен простор. Се заострува регулацијата за приредување огномет, факелијада и слични приредби на кои се користат експлозивни материи“, рече Јаревски.
Тоа ќе значи и заострување на казните за поединци и фирми кои ќе ги прекршат одредбите од овој закон. Дел од казните се двојно повисоки, а за некои, законот предвидува и притвор.
Говорејќи пред новинарите, Јаревски рече дека неделава биле посветени на изнаоѓање на решенија кои во иднина нема да дозволат да се случат нови трагедии или хаварии.
Тој најави дека во периодот кој следи, во Собранието ќе се поднесат и други предлози кои се подготвуваа изминативе две недели – период во кој Собранието не заседава по трагедијата во Кочани.
