Разрешени се две судики од Скопска Апелација за спорната пресуда за Македонски Телеком. Третата членка на Советот кој носел одлука во случајот е казнета парично. Според информации на Пресс24 Судскиот Совет денеска донел одлука за разрешување на судиките Наташа Савовска Димитровска и Роза Георгиева додека пак парично казнета е судиката Јетмире Ајдини Бошњаку. Со пресудата на Скопска Апелација Телеком беше задолжен да исплати 4 милиони евра на фирмата Фокуснет од Штип. Претставката за оваа пресуда до Судскиот Совет ја поднесе Телеком со тврдење дека била донесена незаконски и поради сомнежи за можна поврзаност на членовите на судечкиот совет со фирмата која треба да ги наплати парите. За случајот предмет отвори и јавното обвинителство. На денешната седница парично е казнет и судијата Пајазит Пајазити од Скопскиот Кривичен Суд за постапувањето во случајот со притворот на поранешниот војник на ОВК Блерим Рамадани. Судијата му одреди домашен наместо ефективен притвор по што Рамадани се даде во бегство.
