Американскиот претседател Доналд Трамп го разреши претседателот на Здружениот генералштаб на САД, Чарлс Браун и разреши уште пет адмирали и генерали, со што го смени составот на највисокото раководство на американската војска.
Генералот на американските воздухопловни сили Браун служеше како претседател на Здружениот Генералштаб од 2023 година, а беше назначен од поранешниот претседател Џо Бајден.
Браун, вториот црн функционер на толку висока позиција, се очекуваше да го заврши својот четиригодишен мандат во септември 2027 година.
Во соопштението на Пентагон се вели дека Трамп ќе го номинира пензионираниот генерал Ден „Разин“ Кејн на позицијата на Браун.
Одделно, Пентагон објави дека Трамп ќе го смени и шефот на американската морнарица, адмирал Лиза Франчети – првата жена на толку висока воена функција – како и заменик-началникот на Генералштабот на воздухопловните сили, Џим Слајф.
Од должност се разрешени и државните обвинители на армијата, морнарицата и воздухопловните сили.
Слајф ја предводеше командата за специјални операции на воздухопловните сили пред да стане заменик-началник на Генералштабот за операции на Блискиот Исток и Авганистан.
Овие одлуки се дел од кампањата предводена од американскиот секретар за одбрана Пит Хегсет за напуштање на различностите, правичноста и програмите за вклучување во војската.
Хегсет рече дека Одделот за владина ефикасност (DOGE) ќе има „широк пристап“ за искоренување на овие програми од Пентагон.
DOGE ќе работи „на пронаоѓање на технолошки вишок и ќе ги идентификува последните остатоци од приоритетите на Бајден“, како што е програмата за децентрализирано вклучување (DEI).
Овие „не се во суштината на нашата мисија и ќе ги фрлиме“, рече Хегсет.
Извршниот директор на SpaceX и Tesla, Илон Маск – најбогатиот човек во светот – беше ангажиран од Трамп да ја води канцеларијата на DOGE.
Напорите на Маск да ја зголеми ефикасноста резултираа со отпуштања на десетици илјади федерални работници, што предизвика правни постапки од други страни.
Пентагон се подготвува за масовни отпуштања на цивилен персонал, по изјавите на Хегсет минатата недела во врска со буџетските распределби.
Трамп не наведе причина зошто го смени Браун, иако му се заблагодари за над „40 години служба на нашата земја“.
„Тој е господин и извонреден лидер и му посакувам нему и на неговото семејство прекрасна иднина“, рече Трамп.
Отворената поддршка на Браун за кампањата „Животите на црнците се важни“, предизвикана од убиството на Афроамериканецот Џорџ Флојд во 2020 година, можеби го направи цел на администрацијата што се бори против програмите за инклузивност во војската.
Хегсет беше скептичен кон Браун пред да ја преземе функцијата во Пентагон, покренувајќи прашања во книгата објавена минатата година за тоа дали Браун би ја освоил позицијата ако не бил црнец.
Демократот Адам Смит рече дека „масакрот на Трамп во петокот вечерта“ дополнително го зголеми хаосот во Пентагон. Тој го бранеше Браун како интелигентен и вистински патриот.
Намалувањето на цивилниот персонал во Пентагон ќе започне следната недела.
Дарин Селник, вршител на должноста потсекретар за одбрана за персонални прашања, во изјавата рече дека најмалку 5 отсто од работната сила ќе бидат отпуштени. Кратењата ќе се фокусираат на работниците кои неодамна се приклучија на персоналот, кој брои околу 900.000 работници.
Селник рече дека отпуштањето на околу 5.400 работници ќе биде проследено со замрзнување на новите работни позиции додека не се направи дополнителна анализа на потребите од персонал.
Еден ден пред оваа објава, Хегсет во видео порака рече дека „не е во јавен интерес да се задржат луѓе чиишто придонеси не се критични за мисијата“.
