Српската нафтена индустрија (НИС) ги прилагодува своите операции на санкциите на САД што стапија на сила на 9 октомври, се вели во денешното соопштение на мнозинскиот сопственик на НИС, руската компанија „Газпром Нефт“.
НИС продолжува, како што е наведено, да произведува сопствена сурова нафта, што му овозможува да акумулира одредени резерви на сурова нафта, а како што дознава „Танјуг“, станува збор за многу мали количини што се недоволни за процесот на рафинирање.
Производствените и комерцијалните активности на НИС продолжуваат во адаптиран формат, земајќи ги предвид постојните надворешни ограничувања, додава руската компанија.
Како што е наведено, српскиот пазар во моментов се снабдува со нафтени производи во потребните количини.
„Газпром Нефт“ потсетува дека преработката на сурова нафта во рафинеријата во Панчево беше привремено прекината на 25 ноември.
„Раководството на НИС, со поддршка на Владата на Република Србија, вложува максимални напори за минимизирање на влијанието на надворешните фактори и обезбедување стабилни испораки на производи, додека останува сигурен партнер за своите клиенти и одговорен работодавач за своите вработени“, забележува „Газпром Нефт“.
Оперативните активности на НИС, вклучително и сметководството и обезбедувањето континуитет на работењето, се спроведуваат со целосна и сеопфатна поддршка од Владата на Србија.
Оваа конструктивна интеракција и партнерство помеѓу компанијата и државните институции на Република Србија се клучни за одржување на стабилноста и овозможување ефикасно управување со моменталната состојба во интерес на своите вработени, партнери и економијата на земјата како целина.
Акционерите на НИС се активно вклучени во интензивен мултилатерален дијалог насочен кон што побрзо решавање на моменталната состојба, заклучува „Газпром Нефт“ во соопштението.
