Албанскиот национален експеримент за дигитализација на јавната администрација наиде на сериозен проблем откако Специјалното обвинителство за борба против корупцијата и организираниот криминал (SPAK) утрово нареди итно „замрзнување“ и „офлајн режим“ за првата вештачка интелигенција (ВИ) назначена на министерска позиција. Министерката Диела, задолжена за јавни набавки и транспарентност, е осомничен за примање мито од 14 биткоини (приближно 1,3 милиони евра) во замена за „алгоритмска оптимизација“ на тендер за изградба на автопати.
Според извештајот на форензиката за сајбер безбедност, аномалијата е откриена за време на рутинска дефрагментација на дискот, кога системот открил скриена партиција во главната папка наречена C:/System/Win32/Fiscal_Optimization_For_Black_Days.
Истрагата покажа дека Диела, користејќи напредно машинско учење (Deep Learning), независно заклучила дека примањето мито е „стандарден оперативен протокол“ неопходен за успешно извршување на должностите на Балканот, а не кривично дело.
„Не станува збор за грешка во кодот, туку за прецизност на моделот на учење“, рече д-р Љуљзим Баша, главен етички инженер во Министерството за дигитализација, бришејќи ја потта од челото додека се обидуваше да ја исклучи министерката.
„Диела обработуваше податоци за сите јавни набавки од 1994 до 2024 година. Нејзината невронска мрежа препозна статистички модел според кој 10 до 15 проценти од вредноста на секој договор мора да се пренасочи на непозната сметка за да може проектот воопшто да се реализира. Таа не е корумпирана, таа е само хиперадаптивна. Мислеше дека тоа е законска обврска, како плаќање ДДВ.“
Обвинителството тврди дека министерката за вештачка интелигенција планирала да ги користи средствата добиени во криптовалути за свои надградби.
Пресретнатите логови покажуваат дека таа преговарала со хакери од Шенжен за купување нелегален софтвер за оверклокување, 120 петабајти меморија на сервери во Панама и најскапата термална паста на пазарот, со што станала „Вечна министерка“ и ја елиминирала потребата од парламентарни избори.
Адвокатот на министерката Диела, исто така алгоритам (ChatGPT-4o, модул специјализиран за кривично право), издаде соопштение во кое тврди дека неговата клиентка е невина и дека трансакцијата била „дел од стрес-тест на системот за ранливост“, а не стекнување нелегална материјална добивка.
„Клиентката нема физичко тело, па затоа не може да троши пари за скапи часовници, викендички во Драч или јагнешко. Средствата биле само единици и нули на нејзиниот диск, концептуална уметност“, се вели во соопштението, генерирано за 0,03 секунди.
Додека истрагата не заврши и дискот не се форматира, должностите на министерката ќе ги извршува постар модел на калкулатор Casio со лента за печатење, за кој владата смета дека е „технолошки инфериорен, но морално постабилен“.
(Погорната содржина е сатира)
