Ландо Норис ја освои првата титула во шампионатот на Ф1 во својата кариера, откако со третото место на Гран При на Абу Даби стави крај на возбудливата сезона.
Британецот стартуваше од втората позиција, веднаш зад Макс Ферстапен, но во првиот круг го загуби местото од Пјастри, кој направи импресивен маневар од надворешната страна на деветиот свиок.
Сепак, Норис не се обиде да се бори директно со Ферстапен и со Пјастри, знаејќи дека доволно е да се искачи на подиумот за да ја обезбеди титулата.
Се работеше за контролиран настап, со исклучок на моментот во 23-от круг кога Норис беше исфрлен надвор од патеката при обидот за напад на Јуки Цунода. Стјуардите го санкционираа Јапонецот за повеќекратна промена на линијата, што му овозможи на пилотот на Мекларен да вози со поголема сигурност до крајот.
На крајот, Норис го мина карираното знаме на третата позиција, зад Ферстапен и зад Пјастри, кои финишираа на првото и на второто место.
Така, Ландо Норис го освои шампионатот со предност од само два поени пред Ферстапен, спречувајќи го Холанѓанецот да ја освои својата петта последовна титула и да ја израмни рекордната серија на Михаел Шумахер.
