Новиот светски шампион во Формула 1, Ландо Норис, потврди дека следната сезона ќе го користи најпрестижниот број во овој спорт, бројот 1, на својот болид на Мекларен.
Ова значи крај на ерата на бројот 1 за Макс Верстапен, кој го користеше овој број од 2022 година, откако ја освои својата прва титула во 2021 година, и го задржа четири последователни сезони.
Норис, кој традиционално се тркаше со бројот 4, одлучи да ја искористи привилегијата што му припаѓа како актуелен шампион. Според правилата на Ф1, бројот 1 е резервиран исклучиво за актуелниот светски шампион, но возачот има право да одлучи дали ќе го користи или ќе се држи до својот постојан број.
„Тоа е традиција, таа е таму со причина. Таа е таму затоа што можеш да одиш и да се обидеш да ја освоиш, и можеш напорно да работиш за да ја добиеш“, изјави Норис за „Скај Спортс Њуз“.
Норис истакна дека одлуката не е само лична, туку е признание за целиот тим на Мекларен:
„Сите ние како тим во Мекларен ќе го носиме тоа со гордост. Тоа е за сите мои механичари, инженери, сите што се дел од Мекларен. Тоа е нивна гордост, знаејќи дека вложиле многу работа и напор за да можат да речат: ’Ние сме број еден’. Не е толку кул кога велиш ’ние сме број четири’, така што тие ќе бидат уште посреќни од мене!“
Од 2014 година, кога на возачите им беше дозволено да изберат постојан број за нивната кариера, единствениот шампион кој ја одби можноста да го користи бројот 1 беше Луис Хамилтон, кој цврсто се држеше до својот 44.
Со нов болид, нов број и новостекната самодоверба како светски шампион, Ландо Норис ќе ја започне следната сезона со голем притисок, но и со најголемата чест во Ф1.
