Американскиот долар ја завршува 2025 година на „клизав терен“ и е на пат кон најголем годишен пад од 2017 година, а доколку слабеењето продолжи и во последната недела од декември, падот може да стане најдлабок од 2003 година – односно во распон што ретко се гледа во последните две децении. На девизните пазари долар-индексот денеска се спушти на околу 97,8 поени, што е најниско ниво во повеќе од два месеца, а годишниот минус се движи околу 9,8 проценти.
Клучната причина што ја „држи“ валутата под притисок се очекувањата дека ФЕД ќе има простор за нови намалувања на каматните стапки во 2026 година, и тоа и покрај солидните податоци за американскиот раст. Пазарите, во исто време, читаат спротивен сигнал од дел од другите централни банки: Европската централна банка ја задржа каматата и ги ревидираше нагоре дел од проекциите, што ја поддржа европската валута, додека кај Австралија и Нов Зеланд растат очекувањата дека следните потези би можеле да бидат и нагорни.
Во таа слика, еврото е меѓу најголемите „победници“ годинава со раст од над 14 проценти, што дополнително ја засилува перцепцијата дека доларот влегува во нов циклус на слабеење – под влијание на каматниот диференцијал, но и на политичката неизвесност и трговските тензии што ги тресеа пазарите во текот на годината.
Паралелно, најновите податоци за глобалните девизни резерви покажуваат и мало намалување на уделот на доларот: во третиот квартал од 2025 година тој паднал на 56,9 проценти, наспроти 57,1 проценти во претходниот квартал – сигнал дека доминацијата не исчезнува, но дека пазарот внимателно ја мери секоја промена во довербата и во геополитичката рамнотежа.
