Менаџерот на Арсенал, Микел Артета, потврди дека германскиот интернационалец Каи Хаверц е многу блиску до враќање во тимот. По тешката повреда на коленото која го оддалечи од терените уште од август, Хаверц би можел да се појави во составот веќе за следните неколку натпревари.
Прашање на денови, а не на недели
Хаверц мораше да оди на операција на коленото, а неговиот камбек беше дополнително одложен по малиот „застој“ во рехабилитацијата за кој претходно информираше германскиот селектор Јулијан Нагелсман. Сепак, 26-годишниот офанзивец веќе тренира со полн интензитет со првиот тим.
„Многу е блиску. Мислам дека е прашање на денови, а не на недели. Ќе видиме како ќе одговори неговото тело во следната фаза, но тој е играч кој многу ни недостигаше. Каи му дава на тимот една поинаква димензија и пресреќен сум што наскоро ќе го имаме на располагање“, изјави Артета по пласманот во полуфиналето на Карабао купот.
Густ распоред и проблеми во одбраната
Ако сè оди според планот, Хаверц би можел да добие минутажа веќе на дуелот против Брајтон (27 декември), или најдоцна против Астон Вила (30 декември).
Сепак, не е сè така розово за Артета. Додека нападот се комплетира, одбраната на Арсенал останува десеткувана. Бразилецот Габриел сè уште не се вратил на тренинзите поради повреда на бутниот мускул, а надвор од стројот се и Бен Вајт и Кристијан Москера. Дополнителна главоболка е и повредата на Пиеро Инкапие, кој исто така е под знак прашалник за следните натпревари.
Арсенал влегува во новата година со големи амбиции на три фронта, а враќањето на Хаверц се смета за клучен фактор за одржување на чекорот со врвот во Премиер лигата.
