Марио (15) од околината на романскиот град Темишвар, кој беше пријавен за исчезнат во понеделник, 19 јануари, беше пронајден мртов и закопан во поле во близина на градот, а полицијата уапси неколку малолетници во врска со злосторството.
Полицијата приведе две момчиња на возраст од 15 години и едно момче на возраст од 13 години под сомнение дека го сториле злосторството.
Постои сомневање дека еден од осомничените, 15-годишно момче, заедно со помладо момче, го убиле Марио со повеќекратни бодења со ножеви и секира, по што повикале друго 15-годишно момче да им помогне да го закопаат телото во замрзната нива, која се наоѓа на неколку десетици метри од куќата каде што живее еден од осомничените.
Едно од постарите момчиња учел во исто одделение со Марио, а тој и помладото момче повеќе од еден месец детално планирале како да го убијат. Мотивот, како што се сомнева, бил љубомора, бидејќи Марио бил исклучително популарен во класот и во друштвото.
Марио бил пријавен за исчезнат во понеделник, а се верува дека осомничените и жртвата прво влегле во вербална расправија, по што осомничените извадиле ножеви и му нанеле бројни смртоносни повреди на несреќното момче. Потоа повикале друго момче, кое им помогнало да го стават телото во градинарска количка, да го однесат на нивата, каде што го запалиле телото, а потоа го закопале во нивата.
Медиумите известуваат дека дупката што ја ископале момчињата не била многу длабока, бидејќи замрзнатата земја им го отежнувала копањето. Лопатата што ја користеле, исто така, наводно била пронајдена.
Според медиумските извештаи, двајца 15-годишници се во притвор, додека помладото момче е ослободено бидејќи поради годините не може кривично да одговара.
