Двајца американски претставници изјавија во средата дека САД му порачале на Иран дека нема да се согласат со неговите барања за промена на локацијата и форматот на разговорите планирани за петок во Истанбул, објави порталот Axios, додека иранските медиуми објавија дека разговорите ќе се одржат во Оман.
САД и Иран претходно се согласија да одржат разговори во Истанбул во петок, а другите земји од Блискиот исток ќе учествуваат како набљудувачи. Но, во вторникот иранската страна побара разговорите да се преместат во Оман и да бидат билатерални, со цел да се фокусираат исклучиво на нуклеарните прашања.
Напорите на Иран да го промени местото и агендата на разговорите доаѓаат во услови на зголемени тензии додека САД градат сили на Блискиот исток. Од друга страна, иранските медиуми објавуваат дека разговорите меѓу САД и Иран ќе се одржат во петок во Оман, иако владите во Вашингтон и Техеран сè уште не ја потврдиле локацијата. Иранските новински агенции Tasnim и ISNA објавија дека фокусот ќе биде на нуклеарната програма на Иран и укинувањето на санкциите.
Иранските медиуми пишуваат дека иранскиот министер за надворешни работи Абас Арагчи и американскиот специјален пратеник Стив Виткоф се очекуваат во Оман, а дека министерот за надворешни работи на Оман, Саид Бадр Албусаиди, ќе учествува како посредник.
Откако безбедносните сили жестоко ги потиснаа насилните краткотрајни протести во Иран претходно оваа година, американскиот претседател Доналд Трамп се закани дека ќе интервенира. Оттогаш американската војска ги зголемува своите сили во регионот, а борбена група бродови во придружба на носачот на авиони „USS Abraham Lincoln“ пристигнаа на Блискиот исток.
