Федералната агенција за спроведување на законите за вработување на САД во средата побара од судот да спроведе судска покана против Nike, обвинувајќи го производителот на спортска облека и опрема за дискриминаторски практики врз белците.
Станува збор за Комисијата за еднакви можности за вработување (EEOC), федералната агенција задолжена за спроведување на законите за забрана на дискриминација при вработување, која во судскиот поднесок наведува дека Nike „не ги доставил сите барани информации“ како дел од истрагата. Агенцијата побарала од федералниот суд во Мисури да наложи спроведување на судската покана.
Според документот, директорката на EEOC, Андреа Лукас, во 2024 година изјавила дека Nike го прекршил законот со дискриминација врз белите вработени, кандидатите за работа и учесниците во програмите за обука, како и со поставување цел 30 отсто од лидерските позиции да ги држат етничките малцинства.
Претседателот Доналд Трамп ја назначи Лукас за раководител на агенцијата во ноември, откако ја назначи во агенцијата во 2020 година. Лукас се спротивставува на програмите за разновидност, еднаквост и вклучување (DEI).
Од Nike одговорија нарекувајќи го барањето на EEOC „изненадувачка и невообичаена ескалација“ и велејќи дека дејствуваат „добронамерно“ во својата истрага.
„Споделивме илјадници страници документи и детални писмени одговори и сме во процес на обезбедување дополнителни информации“, се вели во соопштението на Nike за AFP, додавајќи дека компанијата е „посветена на фер и законски практики за вработување“ и почитување на сите важечки закони против дискриминација.
Nike, исто така, привлече внимание во последниве години поради своите политички ставови, вклучително и рекламна кампања во која се појави поранешниот американски фудбалер Колин Каперник, кој во 2016 година клекна за време на американската национална химна во знак на протест против полициската бруталност врз малцинствата, предизвикувајќи осуда од некои американски конзервативци, вклучувајќи го и Трамп.
