Навивачите на англискиот фудбал се навикнати на многу фудбалски возбудувања за време на Божиќните празници. Сепак, оваа година ги очекува големо изненадување. За прв пат во ерата на Премиер лигата, само еден натпревар е закажан за 26 декември, популарно наречениот Боксинг Деј. Со тоа, прекината е вековната традиција која изненади многумина, со оглед на тоа што овој датум обично е резервиран за цела рунда. Овојпат ќе има само еден меч од Премиер лигата и тоа дуелот меѓу Манчестер Јунајтед и Њукасл Јунајтед.
Премиер лигата објасни дека одлуката да има само еден натпревар е донесена поради исклучително густиот распоред и обврските според договорите за телевизиски права. Бидејќи 26 декември оваа година паѓа во петок, а лигата е поделена на 33 викенди со натпревари и се соочува со продолжена европска сезона, единствениот достапен термин за тој ден беше натпреварот на „Олд Трафорд“.
Сите други натпревари од 18-тото коло од Премиер лигата се поместени за сабота и недела, 27 и 28 декември. Иако оваа ситуација го нарушува долгогодишниот обичај, раководството на лигата ги уверува навивачите дека ова е исклучок.
Тие потврдија дека секогаш кога Боксинг Деј ќе падне во викенд во идните сезони, ќе се врати побогат распоред на натпревари. Ова значи дека ќе се вратиме на старите патеки веќе следната сезона, бидејќи 26 декември 2026 година паѓа во сабота.
