За утре најавено е враќање на двајца пациенти, еден од Литванија и еден од Шведска. Сепак министерот вели дека во меѓувреме можеби ќе има и други пациенти за кои би можело да биде договорен транспорт назад кон Македонија.
Девет пациенти повредени во трагедијата во Кочани кои се лекуваат во странство денеска се враќаат дома. Министерот Арбен Таравари на прес-конференција рече дека остануваат уште 91 пациент кои се лекуваат ширум Европа.
Вели дека добри се информациите кои Министерството за здравство ги добива за критичните случаи кои се во странство.
-Иако се сѐ уште во тешка состојба, меѓутоа, во подобрена состојба во однос на вчерашниот ден. Така што, оптимисти дека и тие ќе почнат да се подобруваат, барем такви ни се информациите. Иако повторно, да не се урочиме, да бидеме внимателни, да не има некои други компликации. Засега ова се информациите, рече Таравари.
-Три од Унгарија, двајца од Италија, еден од Грција, Атина, еден од Белград, којшто е веќе на пат и еден од Шведска. Значи, вкупно девет се враќаат. Остануваат 91 пациент. Едната пациентка којашто е во Бугарија веќе е сместена во хотел и само амбулантски оди на прегледи, рече Таравари.
