Италијанската премиерка Џорџија Мелони денес го посети сицилијанскиот град Нисиеми, каде што десетици куќи останаа на работ на карпест гребен откако свлечиште го погоди подрачјето.
Куќите на рид во Нисиеми, мал град на Сицилија, постепено се уриваат повлечени од серијата свлечишта, принудувајќи повеќе од 1.500 луѓе да се евакуираат. Катастрофата се случи во неделата навечер, но продолжи да се шири во понеделникот.
„Има куќи на работ на свлечиштето кои се непогодни за живеење“, изјави шефот на цивилната заштита Фабио Чичилијано за новинарите на местото на настанот, додавајќи дека загрозените жители ќе бидат преместени.
Мелони утрово со хеликоптер прелета над подрачјето погодено од свлечиштето пред да слета во Нисиеми за да се сретне со локалните власти и да ја процени ситуацијата.
Владата во понеделникот прогласи вонредна состојба за Сицилија, Сардинија и Калабрија, трите јужни региони најтешко погодени од силни бури во последните денови.
Владата издвои околу 100 милиони евра за задоволување на првичните потреби на погодените подрачја, но локалните власти ја проценуваат вкупната штета на повеќе од две милијарди евра.
