Англискиот гигант Манчестер Јунајтед платил околу 17,5 милиони евра за да ги раскине договорите со поранешниот тренер Ерик тен Хаг, спортскиот директор Ден Ешворт и другите членови на стручниот штаб, објавија „црвените ѓаволи“.
Овие „исклучителни трошоци“ за четвртиот квартал од 2024 година се однесуваат на „трошоците поврзани со заминувањето на поранешниот тренер на првиот тим Ерик тен Хаг и разни членови на менаџерскиот тим“, напиша Манчестер Јунајтед.
Поточно, Манчестер Јунајтед мораше да плати 12,5 милиони евра за заминувањето на Тен Хаг и неговите помошници и уште 5 милиони за заминувањето на нивниот спортски директор.
Вкупните загуби за овој квартал изнесуваат 33,4 милиони евра.
Холандскиот тренер доби отказ во октомври, само три месеци откако го продолжи договорот до 2026 година, во време кога „црвените ѓаволи“ беа на 14. место на табелата.
Него го наследи Португалецот Рубен Аморим, но 20-кратниот англиски шампион моментално е 15-ти во Премиер лигата.
Само Вест Хем и Вулверхемптон го делат клубот од зоната за испаѓање.
За да се ублажи финансискиот недостаток, клупските челници презедоа мерки за намалување на трошоците, отпуштајќи 200 вработени. Ги зголемија и цените на билетите и му го откажаа „амбасадорскиот“ договор на легендарниот тренер Алекс Фергусон, кој изнесуваше 2,4 милиони евра годишно.
