Сонот за одење на Светското првенство се претвори во кошмар за еден од најлојалните навивачи на Англија откако ФИФА ги објави цените на билетите за Светското првенство во 2026 година.
Пол Грегори, попознат како Танго, кој ја следи репрезентацијата на Англија 40 години и присуствувал на повеќе од 400 последователни натпревари, би можело да го види крајот на неговата неверојатна серија поради високите цени на билетите.
Навивачите на Англија ќе мора да издвојат најмалку 526 фунти (околу 600 евра) за еден натпревар од групната фаза, додека најскапиот билет за натпреварот против Хрватска чини 523 фунти (595 евра), повеќе од билет за финалето на Светското првенство во 2022 година во Катар. Цените за финалето достигнуваат неверојатни 6.489 фунти (7.391 евра), што е целосно недостапно за повеќето навивачи.
„Чистата алчност го убива фудбалот. Многумина што планираа да патуваат сега не можат“, изјави Грегори за „Сан спорт“, додавајќи дека Светското првенство било уништено пред да започне.
Според него, фудбалот е спорт на работничката класа, но високите цени го претвориле во луксуз.
Дополнителен проблем е логистичкиот хаос бидејќи ФИФА сè уште не ги објавила сите градови домаќини на натпреварите, што го отежнува планирањето на патувањата и ги зголемува трошоците.
Организациите на навивачите веќе остро ја осудија политиката на цени на ФИФА, велејќи дека лојалноста на навивачите очигледно е заменета исклучиво со профит.
