Според дневниот ред објавен на веб-страницата на Собранието, седницата во 15:30 часот ќе ја отворат Иванка Василевска и Карло Реслер, копретседатели на Мешовитиот парламентарен комитет ЕУ-Северна Македонија, по што ќе следи размена на мислења со Тимчо Муцунски, министер за надворешни работи и надворешна трговија и Орхан Муртезани, претставник на Владата за европски прашања.
На седницата е предвидено да говорат и полскиот амбасадор како претставник на полското претседателство со Советот на ЕУ и амбасадорот на ЕУ во земјава Михалис Рокас како претставник на Европската комисија и Европската служба за надворешни работи.
Претставниците на ЕП ќе остварат средби со координаторите на пратеничките групи – со Дафина Стојаноска, заменик координатор на пратеничката група на ВМРО-ДПМНЕ и коалицијата „Таша Македонија“, со Оливер Спасовски, координатор на пратеничката група на СДСМ и коалицијата „За европска Македонија“, со Блерим Беџети, координатор на пратеничката група на Фронтот на ДУИ или на пратеничката група ВЛЕН, со Бобан Карапејовски, координатор на пратеничката група на Движењето ЗНАМ и со Борислав Крмов, координатор на пратеничката група на Левица.
Втората работна средба на Мешовитиот парламентарен комитет Северна Македонија-Европска унија е закажана за утре во 9 часот, а прелиминарна средба ќе се одржи и со претседателот на Собранието, Африм Гаши.
Мешовитиот парламентарен комитет Северна Македонија-Европска Унија е формиран врз основа на Резолуцијата на Европскиот парламент од 10 март 2004 година и претставува важна можност за продлабочување на дијалогот и зајакнување на заедничката посветеност на европската иднина на земјата.
